Հայկական պատվիրակությունը Հաագայում է՝ Վերադարձի ոլորտում փորձի փոխանակման նպատակով

Հրապարակված է հուլ 01, 22

Միգրացիոն ծառայության պետ Արմեն Ղազարյանը և Ծառայության վերադարձի և վերաինտեգրման հարցերի բաժնի պետ Հայկանուշ Չոբանյանը հայկական պատվիրակության կազմում մասնակցում են դեպի Նիդերլանդներ կազմակերպված ճանաչողական այցին՝ վերադարձի ոլորտում փորձի փոխանակման նպատակով: Պատվիրակության կազմում են նաև Արտաքին գործերի նախարարության, Արդարադատության նախարարության, Ոստիկանության անձնագրային և վիզաների վարչության և Միգրացիայի միջազգային կազմակերպության հայաստանյան գրասենյակի ներկայացուցչները:

Հայկական կողմը Հաագայում հանդիպումներ է ունեցել կամավոր վերադարձի և վերաինտեգրման ոլորտում Նիդերլանդների Թագավորության համապատասխան կառույցների գործընկերների հետ։ Մասնավորապես, հանդիպումներ են տեղի ունեցել ՄՄԿ Նիդերլանդների գրասենյակի, Ամստերդամի ՄՄԿ կենտրոնի, Ռոտերդամի՝ չփաստաթղթավորված անձնանց հիմնախնդիրներով զբաղվող հասարակական կազմակերպության, Հայրենադարձության և մեկնման հոլանդական ծառայության, Հատուկ կացարանի, Սոստերբերգի պահման կենտրոնի ներկայացուցիչների, ինչպես նաև Հաագայում Հայաստանի դեսպանության գործընկերների հետ:

Քննարկումների առանցքում եղել է անկանոն միգրանտի կարգավիճակում գտնվող օտարերկրացիների կամավոր վերադարձի եվրոպական փորձառությունը՝ նույն համակարգը Հայաստանում հաջողությամբ ներդնելու նպատակով։

            Այցը կազմակերպվել է Միգրացիայի միջազգային կազմակերպության Հայաստանի և Վրաստանի առաքելությունների կողմից իրականացվող «Հայաստանում և Վրաստանում միգրանտների իրավունքների և լավ կառավարման խթանում» եռամյա (2019-2022թթ․) տարածաշրջանային ծրագրի շրջանակներում:

            Ծրագրի նպատակն է բարելավել Հայաստանի և Վրաստանի կառավարման մարմինների կարողությունները միգրանտների իրավունքների և միգրացիայի կառավարման հարցում, ինչպես նաև խթանել  տարածաշրջանային համագործակցությունն այս հարցում։

Եվրոպական միգրացիոն ցանցի տարեկան համաժողովին

Հրապարակված է հուն 22, 22

Հայաստանի միգրացիոն ծառայության Վերադարձի և վերաինտեգրման հարցերի բաժնի պետ Հայկանուշ Չոբանյանը Փարիզում մասնակցում է Եվրոպական միգրացիոն ցանցի տարեկան համաժողովին, որը կազմակերպում է Ֆրանսիայի ներքին գործերի նախարարության օտարեկրացիների հարցերով գլխավոր գրասենյակի կողմից և նվիրված է կամավոր վերադարձի և վերաինտեգրման աջակցելու հարցերին։

Համաժողովում քննարկվող թեմաների առանցքում ԵՄ և ԵՄ անդամ չհանդիսացող երկրների մոտեցումները և եվրոպական համակարգման հարցերն են։

Համաժողովը կազմակերպված է չորս թեմատիկ բաժանմամբ․

  • ԵՄ քաղաքական և ֆինանսական շրջանակը,
  • Ուղղորդված կամավոր վերադարձի և վերաինտեգրման սխեմաների ավելի լավ փոխըմբռնում և գործակցություն,
  • Կամավոր վերադարձը խթանող մարտահրավերների և նորարարական փորձառության քարտեզագրում,
  • Վերաինտեգրման ծրագրեր, դեպի կայուն վերաինտեգրում:

Այս ձևաչափով հանդիպումը միավորում է քաղաքականություն մշակողներին, գործնական աշխատակիցներին՝ մասնագետներին, հետազոտողներին, հասարակական կազմակերպություններին և միջազգային կազմակերպություններին՝ ազգային և եվրոպական մակարդակներում։ Այն փորձի կառուցողական փոխանակման հարթակ ծառայելու նպատակ ունի:

Հ․ Չոբանյանը ներկայացրել է Հայաստանի վերաինտեգրման փորձը՝ պետական ծրագիրը, որն իրականացվում է երրորդ տարին անընդմեջ, ծրագրի շրջանակում կուտակված փորձը՝ շահառուների թիվը, բաշխվածությունը՝ ըստ վերադարձի երկրների, կարիքների ընդհանուր նկարագրությունը, ինչպես նաև ծրագրի ուղղորդիչ-խորհրդատվական և բնակվարձի փոխհատուցման բաղադրիչները։ Ոլորտի պատասխանատուն նշել է նաև, որ Հայաստանի միգրացիոն ծառայությունը աջակցում է նաև Ուկրաինայից վերադարձող ՀՀ քաղաքացիներին, ովքեր համապատասխանում են ծրագրի չափորոշիչներին․ ընտանիքում կա հաշմանդամություն ունեցող անդամ կամ ընտանիքը բազմազավակ է, ունի 4 կամ ավելի երեխաներ։

Համաժողովի շրջանակում այսօր ևս հանդիպում կա նախատեսված, որը նվիրված է Եվրոպական միգրացիոն ցանցի անդամ պետությունների ներկայացուցիչների գործակցության ամրապնդմանն ու խորացմանը։

 

Այսօր փախստականների համաշխարհային օրն է․2022-ի դրությամբ աշխարհում բռնի տեղահանված է ավելի քան 100 միլիոն մարդ

Հրապարակված է հուն 20, 22

Աշխարհում այսօր՝ հունիսի 20-ին, նշվում է Փախստականների համաշխարհային օրը։

Ըստ ՄԱԿ-ի փախստականների գլխավոր հանձնակատարի (ՄԱԿ ՓԳՀ/UNHCR) «Գլոբալ միտումների» տարեկան զեկույցի՝ 2021 թվականի վերջի դրությամբ պատերազմի, բռնության, հալածանքների և մարդու իրավունքների խախտումների հետևանքով տեղահանվածների թիվը կազմել է 89,3 միլիոն, ինչը 8 տոկոսով ավելի է նախորդ տարվա նույն ժամանակահատվածի համեմատ և կրկնապատկվել է 10 տարի առաջ գրանցված ցուցանիշի համեմատ:

Համաշխարհային բանկի տվյալներով՝ 2021 թ-ին 23 երկրներ՝ ընդհանուր 850 միլիոն բնակչությամբ, բախվել են միջին կամ բարձր ինտենսիվության հակամարտությունների․ նշված է ՄԱԿ ՓԳՀ-ի մամուլի հաղորդագրության մեջ։

Փախստականների (փախստականի իրավական կարգավիճակ ունեցողների) թիվը 2021 թվականին աճել է՝ հասնելով 27,1 միլիոնի։ Տեղահանվածների թիվը, ի թիվս այլ երկրների, բարձրացել է Ուգանդայում, Չադում և Սուդանում: Փախստականների մեծ մասը կրկին հյուրընկալվում է հարևան՝ սակավ ռեսուրսներով երկրներում: Ապաստան հայցողների թիվը հասել է 4,6 միլիոնի՝  ավելանալով 11 տոկոսով:

Հաղորդագրության մեջ նշվում է նաև, որ բռնության և կոնֆլիկտների հետևանքով տեղահանության ծավալները տարեցտարի աճում են, մինչդեռ  տեղահանված անձանց խնդիրների ուղղությամբ դեռ բավարար լուծումներ չկան, մասնավորապես վերադարձի, վերաբնակեցման կամ տեղում ինտեգրման հնարավորությունները։ Այնուամենայնիվ որոշ դրական միտումներ արձանագրվել են․փախստականների և ներքին տեղահանվածների վերադարձի ցուցանիշը 2021 թ-ին աճել է, 71 տոկոսով էլ աճել է կամավոր հայրենադարձության ցուցանիշը՝ մնալով այնուամենայնիվ փոքր։

Փախստականության համաշխարհային միտումների վերաբերյալ ընդհանուր պատկերացում տալու նպատակով ներկայացնում ենք նաև որոշ տվյալներ և փաստեր ՄԱԿ ՓԳՀ-ի գլոբալ զեկույցից․

  • 2022 թվականի մայիսի դրությամբ ավելի քան 100 միլիոն մարդ ամբողջ աշխարհում բռնի տեղահանված է հակամարտությունների, բռնությունների, մարդու իրավունքների խախտումների կամ հասարակական կարգը լրջորեն խախտող իրադարձությունների պատճառով:
  • 2021 թվականի վերջի դրությամբ այդ ցուցանիշը կազմել է 89,3 միլիոն, որը ներառում է.
    • 27,1 միլիոն փախստական, որից
      • 21,3 միլիոն փախստական՝ ՄԱԿ ՓԳՀ-ի մանդատի ներքո,
      • 5,8 միլիոն պաղեստինցի փախստական՝ ՄԱԿ-ի Պաղեստինի փախստականների օգնության և աշխատանքի գործակալության (UNRWA) մանդատի ներքո;
  • 53,2 մլն ներքին տեղահանված անձ,
  • 4,6 մլն ապաստան հայցողներ,
  • 4,4 միլիոն տեղահանված վենեսուելացիներ։

2021 թվականին տեղահանված անձանց վերաբերյալ․

  • Ցածր և միջին եկամուտ ունեցող երկրները հյուրընկալել են տեղահանվածների 83 տոկոսին,
  • Ամենաքիչ զարգացած երկրները ապաստան են տրամադրել ընդհանուր թվի 27 տոկոսին:
  • 72 տոկոսն հանգրվանել է իր ծագման երկրին հարևան երկրներում,
  • Փախստականների ամենամեծ ծավալը մեկ շնչի հաշվով ընդունել է Լիբանանը (1-ը 8-ի), որին հաջորդում են Հորդանանը (1-ը 14-ի) և Թուրքիան (1-ը 23-ի):
  • Տեղահանված փախստականների և վենեսուելացիների ավելի քան երկու երրորդը (69 տոկոս) եկել է ընդամենը հինգ երկրից՝ Սիրիա (6,8 միլիոն), Վենեսուելա (4,6 միլիոն), Աֆղանստան (2,7 միլիոն), Հարավային Սուդան (2,4 միլիոն) և Մյանմար (1,2 միլիոն):
  • 2021 թ-ին 1,4 միլիոն նոր ապաստանի հայց է ներկայացվել աշխարհում։ Ամերիկայի Միացյալ Նահանգները եղել է աշխարհում նոր անհատական ​​դիմումների ամենամեծ ստացողը (188,900), որին հաջորդում են Գերմանիան (148,200), Մեքսիկան (132,700), Կոստա Ռիկան (108,500) և Ֆրանսիան (90,200):
  • 2021 թվականին 5,7 միլիոն տեղահանված անձ վերադարձել է ծագման երկիր, այդ թվում՝ 5,3 միլիոն ներքին տեղահանվածներ և 429,300 փախստականներ։

 

ՄԱԿ ՓԳՀ-ի այս տարվա մամուլի հաղորդագրությունը Փախստականների համաշխարհային օրվա առթիվ հասանելի է հետևյալ հղումով՝ https://www.unhcr.org/news/press/2022/6/62a9d2b04/unhcr-global-displacement-hits-record-capping-decade-long-rising-trend.html

ՄԱԿ ՓԳՀ-ի «Գլոբալ միտումների» զեկույցը տարբեր լեզուներով հասանելի է հետևյալ հղումով՝ https://www.unhcr.org/unhcr-global-trends-2021-media-page.html

Զանգվածային լրատվության միջոցների համար օգտակար կոնտակտներ կարելի է գտնել հետևյալ հղումով՝ https://www.unhcr.org/international-media-contacts.html#media-contacts

Հունիսի 20-ը Փախստականների համաշխարհային օրն է․ փախստականության հայաստանյան փորձառությունը

Հրապարակված է հուն 20, 22

Հունիսի 20-ն աշխարհում նշվում է՝ որպես Փախստականների համաշխարհային օր։ Ներկայացնում ենք փախստականության համատեքստում հայաստանյան փորձառությունը։

Ընդհանուր միտումներ ապաստանի համակարգ

Ընթացիկ տարում Հայաստանի Հանրապետությունից ապաստան և փախստականի կարգավիճակ են հայցել ավելի քան 250 օտարերկրացիներ՝ մեծ մասը Ուկրաինայից։ 2022 թ-ի հունվար-մարտ ժամանակահատվածում Միգրացիոն ծառայությունը (ՄԾ) ապաստանի հայցեր է ստացել աշխարհի 13 երկրներից՝ Ուկրաինա, Իրան, Իրաք, Կուբա, Լիբանան, Սիրիա և այլն։  Վերջին տասը տարիների ՀՀ-ը փախստականի կարգավիճակ է տրամադրել ավելի քան 1500 ապաստան հայցողների։ Վերջին 5 տարիներին ՄԾ-ը տարեկան միջինը 220 ապաստանի հայց է ստանում։

Արցախից տեղահանվածներ

Ծառայությունը 2020 թ-ի սեպտեմբերի 27-ին Ադրբեջանի կողմից Արցախի դեմ սանձազերծված պատերազմի օրերին իրականացրել է Արցախից տեղահանված անձանց տվյալների հավաքագրում, մշակում և, ըստ աշխատանքային անհրաժեշտության, այլ գերատեսչությունների է տրամադրում։ Տվյալները հավաքագրվել են տնայցերի միջոցով՝ Երևանում քաղաքապետարանի Երեխաների և սոցիալական պաշտպանության վարչության տարածքային աշխատակազմերի ներկայացուցիչների ուղեկցությամբ, մարզերում՝ տեղական ինքնակառավարման մարմինների աշխատակազմերի ներկայացուցիչների միջոցով: Էլեկտրոնային շտեմարանում գրանցվել են մոտ 91 հազար անձանց տվյալներ՝ 88 տոկոսը՝ կանայք ու երեխաներ:

Ադրբեջանից բռնի տեղահանված փախստականների բնակապահովման ծրագիր

ՄԾ-ն իրականացնում է Կառավարության 2019-ի նոյեմբերի 21-ի 1666-Ն որոշմամբ մեկնարկած բնակարանային ապահովման ծրագիրը՝ 1988-1992 թթ-ին Ադրբեջանից բռնագաղթած և 30 տարի անօթևան մնացած փախստական ընտանիքների համար: Բնակարանի գնման վկայականներ են տրամադրվել 270 ընտանիքների՝ 3.7 մլրդ. դրամի ընդհանուր արժողությամբ։ Նրանցից մոտ 200 ընտանիքներ (ԲԳՎ ստացածների շուրջ 75 տոկոսը) արդեն իսկ ձեռք է բերել բնակարան։

2022 թվականի մարտի 10-ին ՀՀ կառավարությունն ընդունել է թիվ 283-Ն որոշումը, որով կմեկնարկի ծրագրի իրականացումը ՀՀ մարզերում։ Ըստ 2013 թվականին կատարված ուսումնասիրությունների՝ մարզերում ծրագրի հավակնորդ շահառու են հանդիսանում 254 ընտանիքներ։ Ներկայումս ընթանում է մարզերում բնակվող հավակնորդ շահառուների վերահաշվառման գործընթացը։

         

         

Հղումներ

Միգրացիոն ծառայության՝ փախստականների ինտեգրմանն ուղղված աշխատանքներին կարող եք ծանոթանալ հետևյալ հղումով՝ http://migration.am/general_information

Ապաստանի համակարգը բնութագրող վիճակագրական ցուցանիշները հասանելի են հետևյալ հղումով՝ http://migration.am/statistics

Փախստականների օրվան նվիրված տեղեկատվական նյութեր առկա են նաև ՄԾ ֆեյսբուքյան էջում՝ https://www.facebook.com/media/set/?set=a.2398027603590868&type=3

ԱԺ-ում ներկայացվեց Հայաստան-ԵՄ ռեադմիսիոն համաձայնագրի շրջանակում Լեհաստանի հետ ստորագրված կիրարկման արձանագրությունը

Հրապարակված է հուն 14, 22

Միգրացիոն ծառայության պետ Արմեն Ղազարյանն այսօր Ազգային ժողովում ներկայացրեց «ՀՀ կառավարության եւ Լեհաստանի Հանրապետության կառավարության միջև «ՀՀ և Եվրոպական միության միջև առանց թույլտվության բնակվող անձանց հետընդունման (ռեադմիսիայի) մասին» 2013 թվականի ապրիլի 19-ին Բրյուսելում կնքված համաձայնագրի կիրարկման արձանագրությունը վավերացնելու մասին» օրենքի նախագիծը, որին Կառավարությունը հավանություն է տվել, և Սահմանադրական դատարանը ճանաչել է Սահմանադրությանը համապատասխան:

«Արձանագրությունը սահմանում է մանրամասն կանոններ՝ երկու կողմերից իրավասու մարմինների հաղորդակցության միջոցների, սահմանային անցման կետերի, անհրաժեշտ ներկայացվող փաստաթղթերի, հետընդունման արագացված և տարանցման ընթացակարգերի վերաբերյալ, սխալմամբ կատարված հետընդունման վերաբերյալ, դիվանագիտական առաքելությունների և հյուպատոսական հիմնարկների կողմից կատարվող գործողությունների, ծախսերի և պարբերական խորհրդակցությունների վերաբերյալ»,- նշեց Ա․ Ղազարյանը՝ շեշտելով, որ արձանագրությունը հիմնականում միտված է անօրինական միգրացիայի դեմ պայքարին։

Հարակից զեկուցող Արտաքին հարաբերությունների մշտական հանձնաժողովի անդամ, պատգամավոր Սարգիս Խանդանյանը նշեց, որ հաննձնաժողովում դրական եզրակացություն է տվել փաստաթղթի վավերացմանը և խնդրեց կողմ քվեարկել դրա օգտին:

 

Հայաստանն արդեն ԵՄ անդամ 5 երկրի՝ Գերմանիայի, Ֆրանսիայի, Չեխիայի, Էստոնիայի ու Բուլղարիայի հետ ունի ուժի մեջ մտած կիրարկման արձանագրություններ:

 

Կայացավ վերաինտեգրման հիմնախնդիրներով զբաղվող կազմակերպությունների 13-րդ ֆորումը

Հրապարակված է մայ 27, 22

 

Հայաստան վերադարձող ՀՀ քաղաքացիների վերաինտեգրման հիմնա­խնդիրների շուրջ այսօր տեղի ունեցավ ոլորտի կազմակերպությունների ֆորումի հերթական` 13-րդ հանդիպումը:

Միգրացիոն ծառայության պետի տեղակալ Իրինա Դավթյանը նկատեց, որ եռամսյակային պարբերականությամբ կազմակերպվող այս ֆորումները արդյունավետ ձևաչափ է տեղեկություններով փոխանակվելու համար: «Բավականին նյութ է կուտակվել այս ընթացքում, որով փոխանակվելը օգտակար կլինի ոլորտում մեր ջանքերն ավելի արդյունավետ իրականացնելու համար»,-ասաց նա:

Միգրացիոն քաղաքականության մշակման միջազգային կենտրոնի (ՄՔՄՄԿ/ICMPD) հայաստանյան գրասենյակի ղեկավար Քարել Հոֆսթրան ևս կարևորեց հանդիպումը՝ նշելով, որ ՄՔՄՄԿ-ն ներկայացնելու կարևոր նյութեր ունի, այդ թվում Վերադարձի և վերաինտեգրման եվրոպական ցանցի (ERRIN)  հայաստանյան ծրագրի ամփոփումը, EU4Impact ծրագրի ընթացքը և նոր ծրագիրը վերադարձի ուղղությամբ, որ մեկնարկելու է առաջիկայում:

Կլինիկական հոգեբանության դոկտոր, ERRIN ծրագրի հոգեբան Լիլիթ Մնացականյանը ներկայացրեց իրականացրած աշխատանքները ինչպես Միգրացիոն ծառայության աշխատակազմի ուղղությամբ՝ վիկարային տրավմա, սահմանի պահպանում շահառուի հետ և այլն, այնպես էլ վերադարձող միգրանտների հետ՝ թերապիայի կուրսեր, խորհրդատվություն:

ERRIN ծրագրի կարողությունների զարգացման բաղադրիչի պատասխանատու Քրիստինա Գասպարյանը ներկայացրեց ծրագրի աջակցությամբ իրականացված փորձագիտական, հետազոտական աշխատանքները և դասընթացների շարքը՝ ուղղված Միգրացիոն ծառայության վերադարձի և վերաինտեգրման հարցերի բաժնի կարիքներին և կարողությունների զարգացմանը:

«Հայկական Կարիտաս» կազմակերպության վերադարձի ծրագրերի պատասխանատու Մովսես Հակոբյանը ներկայացրեց Եվրոպական սահմանային և առափնյա պահպանության գործակալության (FrontEx) կողմից իրականացվող վերաինտեգրման ծրագիրը, որը մեկնարկել է շուրջ երկու ամիս, սակայն դեռ աշխատակազմի վերապատրաստման փուլն է, և շահառուների ընդունելությունը կսկսվի առաջիկայում: Ծրագիրը Հայաստանում կիրականացվի 3 տարի ժամկետով, մեկ տարի երկարացվելու հնարավորությամբ, յուրաքանչյուր տարի մինչև 375 ընտանիքի աջակցելու ներուժով: «Աջակցության փաթեթը նման է նախկին ծրագրերի ներառումներին՝ սոցիալական, իրավական, բիզնեսի հիմնման աջակցություն՝ ըստ կարիքի»,-նշեց նա:  

Ֆորումին մասնակցում էին վերադարձի գործընթացներում ներգրավված պետական գերատեսչությունների ներկայացուցիչները՝ Արտաքին գործերի, Կրթության, գիտության, մշակույթի և սպորտի, Առողջապահության, Աշխատանքի և սոցիալական հարցերի նախարարություններից, միջազգային գործընկերները՝ ՀՀ-ում ԱՄՆ դեսպանությունից, Միգրացիայի միջազգային կազմակերպությունից, Հայաստանում Ֆրանսիայի իմիգրացիայի և ինտեգրման գրասենյակից (OFII), ինչպես նաև հասարակական կազմակերպությունների ներկայացուցիչները՝ Մարդը կարիքի մեջ, Հայկական Կարիտաս:

ՄԾ վերադարձի և վերաինտեգրման մասնագետները հանդիպեցին շահառուների հետ

Հրապարակված է մայ 27, 22

Միգրացիոն ծառայության վերադարձի և վերաինտեգրման հարցերի բաժնի աշխատակիցները՝ բաժնի պետ Հայկանուշ Չոբանյանի գլխավորությամբ, հանդիպեցին ՀՀ վերադարձող քաղաքացիների վերաինտեգրմանն ուղղված առաջնային աջակցության պետական ծրագրի շահառուներին:

Ծրագիրը հաստատվել է 2020 թ-ին: Այն բաղկացած է երկու բաղադրիչից՝ ուղղորդիչ խորհրդատվություն և բնակարանային վարձի փոխհատուցում: 6 ամիս տևողությամբ 60 հազար դրամի չափով բնակվարձի փոխհատուցում այս տարվանից կարող են ստանալ ոչ միայն նրանք, ովքեր Հայաստան են վերադարձել հետընդունման (ռեադմիսիոն) համաձայնագրերի շրջանակներում կամ արտաքսվել/վտարվել են օտարերկրյա պետություններից, այլ նաև կամավոր վերադարձող ՀՀ քաղաքացիները, ովքեր առնվազն 1 տարի բնակվել են արտերկրում և վերադարձից հետո առավելագույնը 3 ամսվա ընթացքում  դիմել ծրագրից օգտվելու համար:

Միգրացիոն ծառայություն էին հրավիրվել վերաինտեգրման աջակցության ծրագրից օգտվող քաղաքացիները: Հանդիպումը մի քանի նպատակ էր հետապնդում․ նախ և առաջ՝ պարզել ծրագրի շրջանակներում վերադարձողներին հատկացվող աջակցության արդյունավետությունը շահառուների ինտեգրման համատեքստում, այնուհետև վեր հանել և քննարկել վերադարձից հետո առաջացած տարբեր հիմնախնդիրներ՝ այդ թվում, շահառուների մոտ առաջացած հնարավոր հոգեբանական խնդիրները։ Միևնույն ժամանակ, հնարավորություն  ստեղծել շահառուներին միմյանց հետ ծանոթանալու, փորձի և նոր գաղափարների փոխանակման տեսանկյունից։ Նաև տեղեկացնել այլ ծրագրերի դիմելու հնարավորությունների մասին, ինչպիսիք են օրինակ՝  ICMPD/ՄՔՄՄԿ կողմից իրականացվող EU4IMPACT ծրագրի մասին։ 

ՄԾ վերադարձի և վերաինտեգրման հարցերի բաժնի պետ Հայկանուշ Չոբանյանի խոսքով՝ հավաքը կարևոր է ինչպես փորձի փոխանակման, այնպես էլ ցանցային կապեր ստեղծելու տեսանկյունից, քանի որ առիթ է միմյանց հետ ծանոթանալու, շփվելու և համանման հարցերի, դրանց լուծումների շուրջ զրուցելու համար: Հանդիպմանը մասնակցում և մասնագիտական աջակցություն էր ցուցաբերում Վերադարձի և վերաինտեգրման եվրոպական ցանցի հայաստանյան ծրագրի հոգեբան Լիլիթ Մնացականյանը:

Հանդիպմանը մասնակցել են 12 շահառուներ, որոնք ընտրվել են 2021 և 2022թ․ շահառուների ցանկից և տարբեր վերադարձի երկրներից՝ (Ուկրաինա, ՌԴ, Գերմանիա), ինչպես հարկադիր, այնպես էլ կամավոր վերադարձողներ են։ Կամավոր վերադարձողները հիմնականում Ուկրաինայից են, որոնք պատերազմական իրավիճակով պայմանավորված տեղափոխվել են Հայաստան։

Հանդիպման ընթացքում շահառուները ներկայացրել են իրենց վերադարձի պատմությունները, դժվարությունները, որոնց բախվել են ընդունող երկրներում, այդ թվում՝ արտաքսման ընթացքում իրենց նկատմամբ ցուցաբերված վերաբերմունքը, որը վերջիններիս կողմից բնութագրվում էր որպես նվաստացուցիչ և իրենց սպասումներին հակասող։ Շահառուները շատ հաճախ իրենց խոսքում համեմատականներ էին անցկացնում հայրենիքում և դրսում իրենց ունեցած կարգավիճակի, ապրելակերպի, բժշկա-սոցիալական ծառայությունների տրամադրման որակի և այլ զուգահեռ  իրողությունների միջև։

 

2022թ․ հունվարի 1-ից առ այսօր պետական աջակցության ծրագրի շրջանակներում բնակվարձի փոխհատուցում ստանում է 10 շահառու՝ 17 անձ։

Վերադարձողները ՌԴ-ից (6), Ուկրաինայից (8) և Գերմանիայից (3) են, որոնցից 8-ը վերադարձել է կամավոր, 9-ը՝ հարկադիր:

Նախորդ տարի նշված ժամանակահատվածում պետական աջակցության ծրագրի շրջանակներում բնակվարձի փոխհատուցում ստացել է 7 շահառու՝ 23 անձ։ Վերադարձողները եղել են հիմնականում Գերմանիայից (15),Ավստրիայից (4) և Շվեդիայից  (4), բոլորը՝ հարկադիր։

Շահառուների ընդհանուր թիվը 3 տարիների ընթացքում՝  44 (105 անձ)։

Շահառուների ընտրության հարցում առաջնահերթություն է տրվում հետևյալ խոցելի խմբերին՝ բազմազավակ ընտանիքներին (4 և ավելի երեխաներ ունեցող), տարեցներին (65 տարին լրացած), հաշմանդամություն ունեցող անձանց, անհետաձգելի բուժօգնության կարիք ունեցող անձանց, առանց ուղեկցության վերադարձած և Հայաստանում առանց ծնողական խնամքի մնացած երեխաներին։

 

Ա.Ղազարյանը Նյու Յորքում մի շարք հանդիպումներ է ունեցել

Հրապարակված է մայ 23, 22

Միգրացիոն ծառայության պետ Արմեն Ղազարյանը Նյու Յորքում Միգրացիայի միջազգային դիտարկման ֆորումի շրջանակում երկկողմ հանդիպումներ է ունեցել Դանիայի պատվիրակութան՝ ի դեմս իմիգրացիայի եւ ինտեգրացիայի նախարարության պետքարտուղարի տեղակալ Հաննե Շտիգ Անդերսենի, Նիդերլանդների արտաքին գործերի նախարարության միգրացիայի հարցերով հատուկ բանագնաց Յուստ Կլարենբեեկի և Շվեդիայի Միջազգային զարգացման համագործակցության նախարարության պետքարտուղար Ջենի Օլսոնի հետ:
Կողմերի հետ Ա. Ղազարյանը քննարկել է ինչպես ընթացիկ, այնպես էլ հնարավոր համագործակցության հարցեր, ռեադմիսիոն գործընթացները, ներկայացրել է Հայաստանում ապաստանի համակարգը, մասնավորապես նոր հատուկ կացարանի շինարարությունը ապաստան հայցողների համար: Գործընկերները դիտարկել են Հայաստանում գործունեության շրջանակն ընդլայնելու հնարավորությունը:
Որպես միգրացիայի կառավարման ոլորտում Հայաստանի կառավարության առաջնահերթություն՝ Ղազարյանը շեշտադրել է գործընթացների թվայնացումը: 
Միջազգային գործընկերների հետ Ղազարյանը պայմանավորվածություններ է ձեռք բերել հետագայում ևս փորձի փոխանակման ուղղությամբ:

Միգրացիոն ծառայության պետը ՄԱԿ-ում ներկայացրեց Հայաստանում ոլորտի բարեփոխումների ընթացքը

Հրապարակված է մայ 20, 22

Միգրացիոն ծառայության պետ Արմեն Ղազարյանը ելույթ է ունեցել Նյու Յորքում ընթացող առաջին Միգրացիայի դիտարկման միջազգային ֆորումին՝ կարևորելով ֆորումի ձևաչափը՝ որպես Անվտանգ, կանոնավոր և ապահով միգրացիայի և Փախստականների մասին գլոբալ դաշնագրերի ընդունումից ի վեր միգրացիոն միտումներն ավելի լավ արտացոլելու և գլոբալ ջանքերը միավորելու հնարավորություն:

Նա նշեց, որ Միգրացիայի միջազգային կազմակերպության հետ սերտ համագործակցությամբ Հայաստանը առաջին անգամ 2020 թ-ին և երկրորդ անգամ այս տարի հաստատել է իր ազգային կամավոր զեկույցը՝ Անվտանգ, կանոնավոր և ապահով միգրացիայի գլոբալ դաշնագրի կատարման վերաբերյալ: «Հայաստանը շարունակական ջանքեր է գործադրում երկու դաշնագրերով սահմանված նպատակների իրականացման ուղղությամբ՝ բարելավելով միգրացիայի կառավարումն ու տեղահանված անձանց պաշտպանությունը»,- ընդգծեց Արմեն Ղազարյանը:

Հայաստանի միգրացիոն ծառայության պետը ներկայացրեց, որ Ծառայության կողմից վերջին շրջանում իրականացված լայնածավալ ծրագրերից մեկն ուղղված է փախստականի ձգձգված իրավիճակում հայտնված անձանց բնարանային ապահովման խնդրին՝ բնակարանի գնման վկայագրերի տրամադրման միջոցով: «Միևնույն ժամանակ մենք բախվել ենք տեղահանության ևս մեկ ալիքի՝ Լեռնային Ղարաբաղի բնակչության նկատմամբ դրսևորված ագրեսիայի և ուժի կիրառման հետևանքով: Արցախից տեղահանվածներից նշանակալի թվով  անձինք ապահով վերադարձի հնարավորություն կարող է չունենան՝ նույնիսկ հիմա՝ հրադադարի հաստատումից հետո»,- նշեց Արմեն Ղազարյանը՝ հավելելով Կառավարության կողմից ձեռնարկված աջակցության միջոցառումների մասին և շեշտելով, որ այս առումով Հայաստանի ջանքերը միանգամայն համընկնում են երկու դաշնագրերին՝ ամրապնդելով փախստականների ինքնուրույնությունը ու ընդունող հասարակություններում սոցիալական համերաշխությունը: Նա հատուկ կարևորեց միջազգային հանրության ներգրավվածությունն ու աջակցությունն այս համատեքստում:

Արմեն Ղազարյանն իր ելույթում անդրադարձավ նաև ՔՈՎԻԴ-19 համավարակի ազդեցությանը Հայաստանի վրա և ձեռնարկված միջոցառումներին, մասնավորապես միգրացիայի ոլորտում, ինչպես նաև այս համատեստքում արձանագրված վերադարձի միգրացիոն հոսքին:

Այնուհետև նա ներկայացրեց միգրացիայի կառավարման ոլորտում գործընթացների թվայնացման միտումները Հայաստանում՝ անդրադառնալով օտարերկրացիներին աշխատանքի թույլտվության և այդ հիմքով կացության կարգավիճակի տրամադրման համար գործարկված միասնական էլեկտրոնային հարթակին: Ղազարյանը շեշտեց, որ այն համահունչ է դաշնագրով սահմանած նպատակներին՝ դյուրացնել անհրաժեշտ փաստաթղթերին հասանելիությունը, ապահովել կանոնավոր միգրացիայի ուղիները և կանխարգելել թրաֆիքինգը:

«Մենք վերահաստատում ենք մեր հանձնառությունը բազմակողմանի ջանքերի և մարդու իրավունքների վրա հիմնված լուծումների ուղղությամբ՝ միգրացիայի և շարժունության ոլորտում ի հայտ եկող մարտահրավերներին դիմակայելու առումով»,- եզրափակեց իր խոսքը Հայաստանի միգրացիոն ծառայության պետ Արմեն Ղազարյանը:

Ընդհանուր քննարկման ժամանակ անդրադարձ կատարելով ադրբեջանական պատվիրակության ներկայացուցիչների արձագանքին՝ Միգրացիոն ծառայության պետը նկատեց, որ միգրացիային առնչվող ֆորումը այդ եզրույթի միտումների ու զարգացումների քննարկումների հարթակ է, այլ ոչ թե քարոզչության վերարտադրության վայր՝ ամբողջությամբ մերժելով նման դրսևորումները:

Միգրացիոն քաղաքականության մշակման միջազգային կենտրոնը կշարունակի աջակցել վերադարձի և վերաինտեգրման գործընթացներին Հայաստանում

Հրապարակված է մայ 17, 22

Միգրացիոն ծառայության (ՄԾ) պետի տեղակալ Իրինա Դավթյանն այսօր ընդունեց Միգրացիոն քաղաքականության մշակման միջազգային կենտրոնի (ՄՔՄՄԿ) միգրացիոն երկխոսությունների և համագործակցության գծով տնօրեն Մարտաին Փլյումի և ՄՔՄՄԿ հայաստանյան գրասենյակի ղեկավար Քարել Հոֆսթրային։

Կողմերն ամփոփեցին երկկողմ համագործակցության ընթացիկ փուլն ու քննարկեցին նոր ծրագրերը։ ՄԾ վերադարձի և վերաինտեգրման հարցերի բաժնի պետ Հայկանուշ Չոբանյանը ներկայացրեց վերադարձի ոլորտի առաջնահերթությունները, համագործակցությունը ինչպես միջազգային, այնպես էլ հասարակական հատվածի դերակատարների հետ։

Մ․ Փլյումը, ամփոփելով Վերադարձի և վերաինտեգրմնա եվրոպական ցանցի հայաստանյան ծրագիրը, հայտնեց, որ այն ավարտվում է ընթացիկ տարվա մայիսին, և ՄՔՄՄԿ-ն այս ուղղությամբ Հայաստանում կշարունակի գործունեություն ծավալել հուլիսի 1-ից նոր՝ Վերադարձի և վերաինտեգրման կառույցի ներքո։

«Վերադարձի և վերաինտեգրման եվրոպական ցանցի ծրագիրը Հայաստանում շատ ոգեշնչող էր, և մենք կշարունակենք աջակցել Հայաստանի կառավարությանն այս ուղղությամբ՝ պահպանելով կարողությունների զարգացման և վերադարձող միգրանտներին վերաինտեգրման աջակցության բաղադրիչները»,-նշեց նա՝ հավելելով, որ ծրագիրը կծառայի ոլորտի կարիքներին և եղած բացերին։