Միգրացիոն ծառայության պետը ՄԱԿ-ում ներկայացրեց Հայաստանում ոլորտի բարեփոխումների ընթացքը

Հրապարակված է մայ 20, 22

Միգրացիոն ծառայության պետ Արմեն Ղազարյանը ելույթ է ունեցել Նյու Յորքում ընթացող առաջին Միգրացիայի դիտարկման միջազգային ֆորումին՝ կարևորելով ֆորումի ձևաչափը՝ որպես Անվտանգ, կանոնավոր և ապահով միգրացիայի և Փախստականների մասին գլոբալ դաշնագրերի ընդունումից ի վեր միգրացիոն միտումներն ավելի լավ արտացոլելու և գլոբալ ջանքերը միավորելու հնարավորություն:

Նա նշեց, որ Միգրացիայի միջազգային կազմակերպության հետ սերտ համագործակցությամբ Հայաստանը առաջին անգամ 2020 թ-ին և երկրորդ անգամ այս տարի հաստատել է իր ազգային կամավոր զեկույցը՝ Անվտանգ, կանոնավոր և ապահով միգրացիայի գլոբալ դաշնագրի կատարման վերաբերյալ: «Հայաստանը շարունակական ջանքեր է գործադրում երկու դաշնագրերով սահմանված նպատակների իրականացման ուղղությամբ՝ բարելավելով միգրացիայի կառավարումն ու տեղահանված անձանց պաշտպանությունը»,- ընդգծեց Արմեն Ղազարյանը:

Հայաստանի միգրացիոն ծառայության պետը ներկայացրեց, որ Ծառայության կողմից վերջին շրջանում իրականացված լայնածավալ ծրագրերից մեկն ուղղված է փախստականի ձգձգված իրավիճակում հայտնված անձանց բնարանային ապահովման խնդրին՝ բնակարանի գնման վկայագրերի տրամադրման միջոցով: «Միևնույն ժամանակ մենք բախվել ենք տեղահանության ևս մեկ ալիքի՝ Լեռնային Ղարաբաղի բնակչության նկատմամբ դրսևորված ագրեսիայի և ուժի կիրառման հետևանքով: Արցախից տեղահանվածներից նշանակալի թվով  անձինք ապահով վերադարձի հնարավորություն կարող է չունենան՝ նույնիսկ հիմա՝ հրադադարի հաստատումից հետո»,- նշեց Արմեն Ղազարյանը՝ հավելելով Կառավարության կողմից ձեռնարկված աջակցության միջոցառումների մասին և շեշտելով, որ այս առումով Հայաստանի ջանքերը միանգամայն համընկնում են երկու դաշնագրերին՝ ամրապնդելով փախստականների ինքնուրույնությունը ու ընդունող հասարակություններում սոցիալական համերաշխությունը: Նա հատուկ կարևորեց միջազգային հանրության ներգրավվածությունն ու աջակցությունն այս համատեքստում:

Արմեն Ղազարյանն իր ելույթում անդրադարձավ նաև ՔՈՎԻԴ-19 համավարակի ազդեցությանը Հայաստանի վրա և ձեռնարկված միջոցառումներին, մասնավորապես միգրացիայի ոլորտում, ինչպես նաև այս համատեստքում արձանագրված վերադարձի միգրացիոն հոսքին:

Այնուհետև նա ներկայացրեց միգրացիայի կառավարման ոլորտում գործընթացների թվայնացման միտումները Հայաստանում՝ անդրադառնալով օտարերկրացիներին աշխատանքի թույլտվության և այդ հիմքով կացության կարգավիճակի տրամադրման համար գործարկված միասնական էլեկտրոնային հարթակին: Ղազարյանը շեշտեց, որ այն համահունչ է դաշնագրով սահմանած նպատակներին՝ դյուրացնել անհրաժեշտ փաստաթղթերին հասանելիությունը, ապահովել կանոնավոր միգրացիայի ուղիները և կանխարգելել թրաֆիքինգը:

«Մենք վերահաստատում ենք մեր հանձնառությունը բազմակողմանի ջանքերի և մարդու իրավունքների վրա հիմնված լուծումների ուղղությամբ՝ միգրացիայի և շարժունության ոլորտում ի հայտ եկող մարտահրավերներին դիմակայելու առումով»,- եզրափակեց իր խոսքը Հայաստանի միգրացիոն ծառայության պետ Արմեն Ղազարյանը:

Ընդհանուր քննարկման ժամանակ անդրադարձ կատարելով ադրբեջանական պատվիրակության ներկայացուցիչների արձագանքին՝ Միգրացիոն ծառայության պետը նկատեց, որ միգրացիային առնչվող ֆորումը այդ եզրույթի միտումների ու զարգացումների քննարկումների հարթակ է, այլ ոչ թե քարոզչության վերարտադրության վայր՝ ամբողջությամբ մերժելով նման դրսևորումները:

Միգրացիոն քաղաքականության մշակման միջազգային կենտրոնը կշարունակի աջակցել վերադարձի և վերաինտեգրման գործընթացներին Հայաստանում

Հրապարակված է մայ 17, 22

Միգրացիոն ծառայության (ՄԾ) պետի տեղակալ Իրինա Դավթյանն այսօր ընդունեց Միգրացիոն քաղաքականության մշակման միջազգային կենտրոնի (ՄՔՄՄԿ) միգրացիոն երկխոսությունների և համագործակցության գծով տնօրեն Մարտաին Փլյումի և ՄՔՄՄԿ հայաստանյան գրասենյակի ղեկավար Քարել Հոֆսթրային։

Կողմերն ամփոփեցին երկկողմ համագործակցության ընթացիկ փուլն ու քննարկեցին նոր ծրագրերը։ ՄԾ վերադարձի և վերաինտեգրման հարցերի բաժնի պետ Հայկանուշ Չոբանյանը ներկայացրեց վերադարձի ոլորտի առաջնահերթությունները, համագործակցությունը ինչպես միջազգային, այնպես էլ հասարակական հատվածի դերակատարների հետ։

Մ․ Փլյումը, ամփոփելով Վերադարձի և վերաինտեգրմնա եվրոպական ցանցի հայաստանյան ծրագիրը, հայտնեց, որ այն ավարտվում է ընթացիկ տարվա մայիսին, և ՄՔՄՄԿ-ն այս ուղղությամբ Հայաստանում կշարունակի գործունեություն ծավալել հուլիսի 1-ից նոր՝ Վերադարձի և վերաինտեգրման կառույցի ներքո։

«Վերադարձի և վերաինտեգրման եվրոպական ցանցի ծրագիրը Հայաստանում շատ ոգեշնչող էր, և մենք կշարունակենք աջակցել Հայաստանի կառավարությանն այս ուղղությամբ՝ պահպանելով կարողությունների զարգացման և վերադարձող միգրանտներին վերաինտեգրման աջակցության բաղադրիչները»,-նշեց նա՝ հավելելով, որ ծրագիրը կծառայի ոլորտի կարիքներին և եղած բացերին։

ՄԾ պետը հանդիպել է Միգրացիայի միջազգային կազմակերպության փոխտնօրենի հետ

Հրապարակված է մայ 17, 22

Հայաստանի միգրացիոն ծառայության պետ Արմեն Ղազարյանը Նյու Յորք կատարած այցի շրջանակում հանդիպել է Միգրացիայի միջազգային կազմակերպության (ՄՄԿ) գլխավոր տնօրենի` կառավարման և բարեփոխումների գծով տեղակալ Էմի Փոփի հետ։

Կողմերը կարևորել են երկկողմ կայուն համագործակցությունը։ Ա․ Ղազարյանը հատկապես բարձր է գնահատել ՄՄԿ-ի բազմաշերտ գործունեությունը, տարբեր ուղղություններով տարվող աշխատանքները, աջակցությունը Հայաստանի կառավարությանը միգրացիայի կառավարման ոլորտում բարեփոխումներին:

Միգրացիոն ծառայության պետը ներկայացրել է Հայաստանում միգրացիոն միտումների փոփոխությունները, անդրադարձել նախատեսված կառուցվածքային փոփոխություններին և  ինստիտուցիոնալ բարեփոխումներին։ Առանձնահատուկ շեշտվել է թվայնացման օրակարգի կարևորությունը միգրացիայի կառավարման բարեփոխումների շրջանակներում:

Էմի Փոփն ընդգծել է Հայաստանի նշանակալի առաջընթացը միգրացիայի կառավարման գործընթացում կարողությունների զարգացման համատեքստում: Նա շեշտել է, որ Հայաստանում ձևավորված մի շարք ինստիտուցիոնալ և ընթացակարգային լուծումներ, մասնավորապես վերադարձի և աշխատանքի թույլտվությունների տրամադրման ոլորտում կարող են ուսանելի լինել նաև այլ երկրների համար, ինչի ուղղությամբ ՄՄԿ-ն համապատասխան ջանքեր կգործադրի:

Կողմերը քննարկել են հետագա համագործակցության ուղղությունները, ինչպես նաև կայուն և երկարաժամկետ համատեղ աշխատանքների մեխանիզմները՝ ծրագրային ժամանակավոր նախաձեռնություններին զուգահեռ։

Միգրացիոն ծառայության պետ Արմեն Ղազարյանը Նյու Յորքում է՝ մասնակցելու ՄՄԿ-ի առաջին Միգրացիայի միջազգային դիտարկման ֆորումին (IMRF)։

Ա․Ղազարյանը ԵԱՏՄ գործընկերների հետ քննարկեց միգրացիոն համագործակցության վերաբերյալ հարցեր

Հրապարակված է մար 04, 22

Միգրացիոն ծառայության պետ Արմեն Ղազարյանն այսօր ընդունեց Եվրասիական տնտեսական հանձնաժողովի աշխատանքային միգրացիայի և սոցիալական պաշտպանության դեպարտամենտի տնօրեն Ալտինայ Օմուրբեկովային և ԵՏՀ տնտեսական և ֆինանսական քաղաքականության հարցերով պատասխանատու կոլեգիայի անդամի (նախարարի) քարտուղարության ղեկավար Աման Կոպեսովին։

Ա․ Օմուրբեկովան նշեց, որ հայկական կողմի հետ համագործակցությունը միշտ հարթ է եղել և օպերատիվ, ինչը երկուստեք բարձր գնահատելի է։ «Մենք տարվա սկզբից մշտադիտարկում ենք իրականացնում՝ միգրանտների շրջանում ՌԴ օրենսդրության նոր փոփոխությունների ազդեցությունը հասկանալու նպատակով, և արձանագրել ենք որոշակի ծանրաբեռնվածություն հերթերի և գործընթացների տեսանկյունից, ուստի բանակցում ենք ռուս գործընկերների հետ ԵԱՏՄ անդամ պետությունների միգրանտների համար հավելյալ դյուրացումների շուրջ»,-նշեց նա՝ ընդգծելով մարտի մեկից ուժի մեջ մտած մեղմացումները որոշ կետերով։

Ա․ Ղազարյանը գործընկերներին ներկայացրեց Հայաստանում ԵԱՏՄ քաղաքացիներին հաշվառելու հեշտացված էլեկտրոնային մեխանիզմը՝ ընդգծելով, որ նրանք ազատված են աշխատանքի թույլտվության և աշխատանքային գործունեության հիմքով ժամանակավոր կացության կարգավիճակ ձեռք բերելու պահանջից։ «Մենք մշտապես խստորեն հետևում ենք ԵԱՏՄ պայմանագրի կետերին և կարևորում ենք, որ մյուս գործընկերները ևս հավատարիմ մնան որդեգրված մոտեցումներին»,-ասաց նա։

Կողմերը քննարկեցին համագործակցության այլ կետեր ևս՝ համաձայնեցնելով փոխանակվել առավել ընդգրկուն վիճակագրական տվյալներով, ինչպես նաև դիտարկեցին միգրացիոն գործընթացների կամզակերպման այլ երկրների փորձառություններ։

 

 

Կայացավ ԱՊՀ երկրների միգրացիոն մարմինների ղեկավարների խորհրդի 26-րդ նիստը

Հրապարակված է փետ 18, 22

ԱՊՀ անդամ երկրների միգրացիոն մարմինների ղեկավարներն այսօր առցանց ռեժիմով անցակցրին խորհրդի 26-րդ նիստը։

Կողմերից յուրաքանչյուրը ներկայացրեց իր երկրի միգրացիոն իրավիճակը, միգրացիոն օրենսդրության փոփոխությունները և միգրացիոն իշխանությունների իրավական փորձառությունը նոր կարգավորումների կիրարկման ոլորտում։

ՀՀ ՏԿԵՆ միգրացիոն ծառայության պետ Արմեն Ղազարյանը ներկայացրեց ՔՈՎԻԴ-19 համավարակով պայմանավորված նոր կարգավորումները սահմանահատման և ՀՀ տարածքում գտնվելու առնչությամբ, ներկայացրեց միգրացիոն հոսքերի համեմատական պատկերը։ Նա, ընդգծելով ՀՀ կառավարության համար միգրացիոն ոլորտի գործընթացների թվայնացման կարևորությունը, նշեց, որ 2022 թ-ից սկսած Միգրացիոն ծառայությունը գործարկել է նոր համակարգ՝ բարելավելով օտարերկրացիներին աշխատանքի թույլտվության տրամադրման ընթացակարգը․ կրճատվել են վարչարարությունը, ժամկետները, գործընթացն ամբողջությամբ իրականացվում է էլեկտրոնային հարթակում, որին միաժամանակյա հասանելիություն ունեն գործընթացում ընդգրկված բոլոր պետական մարմինները։ Ա․ Ղազարյանը  նշեց նաև 2019 թ-ից գործարկված ռեադմիսիոն հայցերի գրանցման էլեկտրոնային հարթակի մասին, որը ևս նպաստել է աշխատանքների արագացմանն ու տեղեկատվության փոխանակման արդյունավետության բարձրացմանը։

Աշխատանքային միգրացիայի ոլորտի համակարգման իրենց փորձով կիսվեցին նաև մյուս անդամ պետությունների ներկայացուցիչները՝ ընդգծելով նախքան աշխատանքի մեկնելը միգրանտի իրազեկվածությունն ապահովելու անհրաժեշտությունը։

Քննարկվեց նաև Խորհրդի 2022 թվականի աշխատանքային ծրագիրը, հերթական՝ 27-րդ նիստի անցկացման վայրը և ժամանակը։

ԵՄ և ՄԱԿ գործընկերները աջակցում են միգրացիայի կառավարման ոլորտում ինստիտուցիոնալ բարեփոխումներին

Հրապարակված է փետ 16, 22

Միգրացիոն ծառայության պետ Արմեն Ղազարյանն այսօր մասնակցեց ՄԱԿ-ի փախստականների հանձնակատարի և ՄԱԿ-ի միգրացիայի միջազգային կազմակերպության հայաստանյան գրասենյակների հետ համատեղ կազմակերպված «Միգրացիայի կառավարման կարողությունների հզորացում՝ ի աջակցություն կառավարության՝ CEPA-ին համահունչ բարեփոխումների օրակարգի» ծրագրի մեկնարկի արարողությանը: Եվրոպական միության համաֆինանսավորմամբ իրականացվող բարեփոխումներն ուղղված են միգրացիայի կառավարման ոլորտում արդյունավետության բարձրացմանն ու  ապաստանի և միգրացիայի հարցերում ԵՄ-ի հետ համապարփակ համագործակցության ապահովմանը: «Ներկայում ունենք միգրացիայի կառավարման ապակենտրոն համակարգ, և ֆունկցիոնալի կենտրոնացումը նպաստելու է միգրացիայի ինստիտուցիոնալ համակարգի արդյունավետության բարձրացմանը: Ծրագիրը կարևոր է նաև աշխատակազմի վերապատրաստման և գործընթացների թվայնացման համատեքստում»,-նշեց Ա. Ղազարյանը:

Ոլորտային բարեփոխումները բարձր գնահատեցին նաև արդարադատության նախարարի տեղակալ Արփինե Սարգսյանը, ՀՀ ոստիկանության պետի տեղակալ Արա Ֆիդանյանը, Մարդու իրավունքների պաշտպան ընտրված Քրիստինե Գրիգորյանը, ԵՄ հայաստանյան պատվիրակության գործառնությունների գծով ղեկավարի տեղակալ Սիլիա Կասմանը, ՄԱԿ ՄՄԿ հայաստանյան գրասենյակի ղեկավար Իլոնա Տեր-Մինասյանը և ՄԱԿ ՓԳՀ գործառնությունների բաժնի պատասխանատու  Ալմազբեկ Բուրկուտովը:

Ծրագիրը նպատակ ունի ամրապնդել Հայաստանի Հանրապետության ապաստանի և միգրացիոն համակարգերը՝ նպաստելով անվտանգության ոլորտում ներառական, հաշվետու և արդյունավետ ծառայությունների մատուցման ուղղությամբ կառավարության ջանքերին:

Եվրոպական փորձագիտական առաքելությունը Հայաստանում է միգրացիոն ոլորտի խորհրդատվության նպատակով

Հրապարակված է փետ 14, 22

Միգրացիոն ծառայությունն այսօր հյուրընկալեց ԵՄ Թայեքս տեխնիկական աջակցության գործիքի շրջանակում փետրվարի 14-18-ը փորձագիտական առաքելությամբ Հայաստան ժամանած ներկայացուցչությանը։  Թայեքսը տեխնիկական աջակցության եւ տեղեկատվության փոխանակման գործիք է, որն աջակցում է պետական կառավարման մարմիններին` ԵՄ օրենսդրության մոտարկման, կիրառման, ինչպես նաեւ ԵՄ լավագույն փորձի փոխանակման շրջանակներում:

Փորձագիտական խումբը Հայաստան է ժամանել՝ աջակցելու Միգրացիոն ծառայությանը միգրացիայի համապարփակ կառավարման ոլորտում ինստիտուցիոնալ հիմքեր ձևավորելու գործում, ինչպես նաև  միգրացիայի ոլորտում բիզնես գործընթացների թվայնացման ուղղությամբ, ինչն էլ նպաստելու է Հայաստանի միգրացիոն ինստիտուցիոնալ համակարգի արդյունավետության բարձրացմանը։

ՄԾ պետ Արմեն Ղազարյանը ողջունեց փորձագիտական խմբի ներկայացուցիչներին՝ Լատվիայի ներքին գործերի նախարարության Քաղաքացիության և միգրացիայի հարցերի գրասենյակի ղեկավար Իլզ Բրիեդեին և Միջազգային զարգացման էստոնական կենտրոնի պետական կառավարման և իրավապահ մարմինների փորձագետ Լաուրի Թաբուրին։ Նա ներկայացրեց հայաստանյան կողմի առաջնահերթությունները միգրացիոն բարեփոխումների ոլորտում և հայտնեց, որ ակնկալում է օգտակար խորհրդատվություն ինչպես ընթացիկ, այնպես էլ ծրագրված գործընթացների վերաբերյալ։ 

Միգրացիոն ծառայության պետի տեղակալ Իրինա Դավթյանը ներկայացրեց միգրացիոն իրավիճակը Հայաստանում, ոլորտի քաղաքականությունը, առկա ինստիտուցիոնալ համակարգն ու բարեփոխումների ուղղությունները։

ՄԾ համապատասխան բաժինների պատասխանատուները ներկայացրին ապաստանի համակարգը Հայաստանում, փախստականների ինտեգրման հնարավորությունները, վերադարձի և վերաինտեգրման ծառայությունները, ինչպես նաև օտարերկրացիներին աշխատանքի թույլտվության նոր համակարգը, որ գործարկվել է ընթացիկ տարվա հունվարի մեկից։

Առաջիկա օրերին հանդիպումներ են նախատեսված նաև ՀՀ աշխատանքի և սոցիալական հարցերի և Արդարադատության նախարարություններում և Ոստիկանությունում։

ՄԾ աշխատակիցները մասնակցեցին «Միգրացիոն կամուրջներ Եվրասիայում. COVID-19 դարաշրջանում նոր միգրացիոն իրողություն» ֆորումին

Հրապարակված է դեկ 13, 21

Միգրացիոն ծառայության միգրացիոն ծրագրերի և մոնիթորինգի բաժնի պետ Մարիա Ալլահվերդյանը, Միգրացիոն ծառայության պետի օգնական Նելլի Դավթյանը և ՄԱԿ-ի բնակչութան հիմնադրամի ժողովրդագրական ծրագրերի ղեկավար Աննա Հովհաննիսյանը դեկտեմբերի 8-9-ը Մոսկվայում մասնակցեցին «Միգրացիոն կամուրջներ Եվրասիայում. COVID-19 դարաշրջանում նոր միգրացիոն իրողություն» խորագրով 13-րդ միջազգային ֆորումին։

ՄԱԿ-ի բնակչութան հիմնադրամի և ՌԴ գիտության և բարձրագույն կրթության նախարարության Ժողովրդագրական հետազոտությունների ինստիտուտի աջակցությամբ կազմակերպված երկօրյա գործնական-ակադեմիական համաժողովին բացման խոսքով ելույթ ունեցավ Մոսկվայի Միջազգային հարաբերությունների պետական ինստիտուտի՝ կադրերի գծով պրոռեկտոր Վլադիմիր Մոռոզովը՝ կարևորելով միջոցառումը ինչպես ինստիտուստի ուսանողների համար, այնպես էլ միջազգային գործընկերների հետ համագործակցության տեսանկյունից։ Ժողովրդագրական հետազոտությունների ինստիտուտի տնօրեն, Ժողովրդագրական և միգրացիոն ֆակուլտետի ղեկավար Սերգեյ Ռյազանցևը ներկայացրեց աշխատըաժողովի հիմնական նպատակներն ու օրակարգերը։ Հնչեցին միգրացիայի և ժողովրդագրության թեմայով տարբեր զեկույցներ, իրենց գիտական աշխատանքները ներկայացրեցին մագիստրոսները։

Քննարկումների հիմնական թեմաները ՔՈՎԻԴ-19 համավարակի հետևանքով արձանագրված գլոբալ միտումներն էին միգրացիայի կառավարման ոլորտում, մասնավորապես՝ միգրացիոն հոսքերի կրճատում, զուգահեռաբար սահմանների փակման և կառավարման համատեքստում նույնական քաղաքականության բացակայության պայմաններում միգրանտներին առնչվող խնդիրների սրացում, անմիջականորեն միգրանտների վրա ազդող մի շարք սահմանափակումներ, պատվաստանյութերի փոխճանաչման և ՔՈՎԻԴ-19 թեսթավորման տարբեր կանոնակարգեր, ակադեմիական շարժունության կրճատում, աշխատաշուկաների փոխակերպումներ ինչպես համաշխարհային, այնպես էլ տարածաշրջանային և ազգային մակարդակներում, միաժամանակ միգրանտների դերի փոփոխություն զբաղվածության համակարգում:

Ըստ ներկայացված զեկույցների՝ համավարակի ազդեցությունը միգրացիայի կառավարման ոլորտում ավելի քիչ դրական ազդեցություն ունի (օրինակ, հեռավար արտասահմանյան կրթության պարագայում կրթական միգրանտի վերադարձի քաղաքականություն մշակելու անհրաժեշտությունը վերանում է), ավելի շատ՝ բացասական: Այս ազդեցությունները դրսևորվում են ինչպես էմիգրացիոն, այնպես էլ իմիգրացիոն հոսքերի ուղղությամբ: Էմիգրացիոն հոսքերի ուղղությամբ հիմնականում տեղեկատվական և հյուպատոսական հավելյալ ծառայությունների մատուցման կարիք է առաջանում, իմիգրացիոն հոսքերի ուղղությամբ՝ կոնկրետ կանոնակարգերի ներմուծման:

Քննարկված առողջապահական բնույթի մի շարք հարցերի թվում  էին իմիգրանտների, այդ թվում՝ փախստականների և ապաստան հայցողների հասանելիությունը պատվաստանյութերին, ինչպես նաև վարակից բուժումը, ինչը առաջարկվում էր կանոնակարգել առողջական ապահովագրության միջոցով:  

          Աշխատաժողովի մասնակիցները փաստեցին նաև, որ համավարակով պայմանավորված համաշխարհային միտում է նաև տնտեսության թվայնացման տեմպերի բազմապատկումը, դրան զուգահեռ աշխատանքային միգրացիայի հնարավորությունների սահմանափակումը: Արդյունքում, շատ միգրանտներ թվային տնտեսության մեջ ադապտացվելու և ինքնաիրացվելու խնդիր ունեցան: Համավարակի պայմաններում սահմանների կառավարման ոլորտում ևս շատ երկրներ կիրառում են թվային գործիքներ, որոնց հասանելիությունը միգրանտներին ապահովելը ևս համակարգային լուծում է պահանջում:

          Միջոցառման մասին մանրամասն տեղեկություններ հասանելի են  https://idrras.ru/news/2021/december/migration-bridges-in-eurasia-2021.html հղումով։

«ՃԱՄՊՐՈՒԿ 2021» լրագրողական ամենամյա մրցույթն ընդունում է մասնակցության հայտեր

Հրապարակված է նոյ 11, 21

ՀՀ Տարածքային կառավարման եւ ենթակառուցվածքների նախարարության Միգրացիոն ծառայությունը եւ Հայաստանում ՄԱԿ-ի Փախստականների գործակալությունը շարունակում են «ՃԱՄՊՐՈՒԿ» ամենամյա լրագրողական մրցույթի ավելի քան տասնամյա ավանդույթը։

Այս տարի մրցույթին կարող են ներկայացվել 2020 թ. նոյեմբերի 15-ից մինչեւ 2021 թ. նոյեմբերի 30-ն ընկած ժամանակահատվածում հրապարակված նյութերը՝ հետեւյալ թեմաներով.

  • ապաստանի համակարգ. փախստականներ, միջազգային պաշտպանություն և ինտեգրում ՀՀ-ում.
  • միգրացիոն գործընթացներ և միգրանտներ.
  • տեղահանություն և տեղահանված անձանց խնդիրներ։

Մրցույթին կարող են մասնակցել հեռուստատեսության, ռադիոյի, տպագիր մամուլի, էլեկտրոնային մեդիա ոլորտի բոլոր ժանրերում գործունեություն ծավալող լրագրողներ եւ թղթակիցներ, անկախ բլոգերներ, լուսանկարիչներ, մուլտիմեդիայի մասնագետներ։

Մրցույթի արդյունքների ամփոփմամբ կազդարարվեն 1-ին, 2-րդ եւ 3-րդ մրցանակների հաղթողները, ինչպես նաեւ կընտրվեն խրախուսական մրցանակների հաղթողները։

Մրցույթի մասնակիցների կողմից ներկայացված աշխատանքները կքննարկվեն ժյուրիի կողմից եւ կամփոփվեն մրցանակաբաշխության հանդիսավոր արարողությամբ՝

2021 թ. դեկտեմբերի 18-ին՝ Միգրանտների միջազգային օրը։

Նյութերն անհրաժեշտ է ուղարկել մինչեւ 2021 թ. նոյեմբերի 30-ը, ժ. 23։59, էլ-փոստի armye@unhcr.org եւ migrationservice.sms@mta.gov.am հասցեներով՝ պարտադիր նշելով հետեւյալը.

- հեղինակի անունը եւ ազգանունը,

- կոնտակտային տվյալներ (հեռախոսի համար, էլ-փոստի հասցե),

- հրապարակման ամսաթիվը, հղումը, հեղինակության լրացուցիչ հիմնավորում (եթե մասնակիցը տեսնում է դրա կարիքը),

- լրատվամիջոցի անվանումը։

Հարցերի դեպքում խնդրում ենք զանգահարել հետեւյալ հեռախոսահամարներով՝ 091 41 61 27, 091 52 02 54։

«ՃԱՄՊՐՈՒԿ 2021» լրագրողական մրցույթի նպատակը թեմատիկ լուսաբանման ոլորտում լավագույն փորձը խրախուսելն է։ Հայաստանում փախստականների, տեղահանված անձանց և միգրանտների ու նրանց ինտեգրման գործընթացների վերաբերյալ գրագետ եւ ազդեցիկ մեդիա բովանդակությունը քաջալերելով՝ նպատակ ունենք ոգեշնչելու լրագրողներին՝ առավել ընդգրկուն, ճշմարիտ եւ անաչառ մոտեցումներ ցուցաբերելու տեղահանված անձանց և միգրանտների վերաբերյալ լրագրության և լուսաբանման գործում։

Ա․Ղազարյանը Վիեննայում հանդիպել է ՄՄԿ ներկայաուցիչների հետ

Հրապարակված է հոկ 19, 21

Միգրացիոն ծառայության պետ Արմեն Ղազարյանը, ով աշխատանքային այցով գտնվում է Վիեննայում, հանդիպել է ՄԱԿ-ի միգրացիայի միջազգային կազմակերպության (ՄՄԿ) տարածաշրջանային գրասենյակի ներկայացուցիչների հետ։

Հանդիպմանը մասնակցել են ՄՄԿ տարածաշրջանային միգրացիոն առողջության խորհրդատու Խայմե Կալդերոն, Իմիգրացիայի և սահմանների կառավարման ավագ փորձագետ Պիեռ Ռոսի Լոնգիի, Աշխատանքային միգրացիայի և մարդկային զարգացման ավագ փորձագետ Մայքլ Նյուսոնը, Քաղաքականության և կապի փորձագետ Ամր Թահան։

Կողմերը քննարկել են հայաստանյան միգրացիոն ոլորտի բարեփոխումները, մասնավորապես օտարերկրացիներին աշխատանքի թույլտվության նոր հարթակի գործարկումը 2022 թ-ի հունվարի մեկից, ինչպես նաև նախատեսվող ինստիտուցիոնալ փոփոխությունները, որ ամենամասշտաբայինն են լինելու Հայաստանի համար միգրացիայի ոլորտում։

Ա․Ղազարյանն ընդգծել է, որ ներկայացված գործընթացներում ՄՄԿ հայաստանյան գրասենյակը գործուն աջակցություն է ցուցաբերում, և սերտ համագործակցությունը նպաստում է համատեղ աշխատանքների իրականացմանը բարձր արդյունավետությամբ։

ՄՄԿ փորձագետները կիսվել են իրենց փորձառությամբ ինչպես իմիգրացիոն հոսքերի կառավարման, այնպես էլ մասնավորապես աշխատանքային միգրացիայի ոլորտի կանոնակարգերի մասով, փոխանակվել են կարծիքներով, պայմանավորվածություն ձեռք բերել հետագա համագործակցության վերաբերյալ։